5,5 milyon insana yanacaq dəstəyi veriləcək - Maşınla işə gedənlər faydalanacaq

Fransada yanacaq qiymətlərinin artması fonunda milyonlarla işçini əhatə edən yeni dəstək proqramı hazırlanıb. Avtomobillə işə gedib-gələn 5,5 milyon nəfər 100 avroluq yanacaq yardımından yararlana biləcək.

Hurriyyet.media  xəbər verir ki, əvvəllər təxminən 3 milyon nəfəri əhatə edən proqramın əhatə dairəsi genişləndirilib və daha 2,5 milyon nəfər sistemə daxil edilib. Dəstəyin xüsusilə işə getmək üçün avtomobildən istifadə etməyə məcbur olan aşağı və orta gəlirli işçilərin artan yanacaq xərclərini azaltması nəzərdə tutulur.

Yeni qaydalarla dəstəkdən yararlanmaq üçün müəyyən edilən gəlir hədləri də genişləndirilib.

Tək yaşayan və aylıq xalis gəliri təxminən 2 050 avroya qədər olan işçilər proqramdan yararlana biləcəklər.

Cütlüklər üçün gəlir həddi təxminən 4 070 avro, iki uşağı olan ailələr üçün isə 6 100 avroya qədər müəyyən edilə bilər.

Lakin yalnız gəlir meyarına cavab vermək kifayət etməyəcək. Dəstəyin əsasən avtomobildən işə gedib-gəlmək üçün müntəzəm istifadə edən şəxslərə verilməsi nəzərdə tutulur.

Bunun üçün evlə iş yeri arasındakı məsafənin ən azı 15 kilometr olması və ya şəxsin il ərzində avtomobillə ən azı 8 min kilometr məsafə qət etməsi tələb olunur.

Şərtlərə cavab verən şəxslərə 100 avro məbləğində yardım ödəniləcək. Bu vəsaitin oktyabr, noyabr və dekabr aylarında yanacaq xərclərinin azaldılmasına kömək etməsi planlaşdırılır.

Əvvəllər eyni dəstəkdən yararlanan şəxslərə yeni ödənişin avtomatik şəkildə həyata keçiriləcəyi, yeni hüquq qazananların isə müəyyən edilmiş şərtlərə əsasən proqrama daxil ediləcəyi bildirilir.

Yanacaq yardımının genişləndirilməsi Fransa hökumətinin açıqladığı daha böyük dəstək paketinin bir hissəsidir.

Yeni tədbirlər üçün təxminən 450 milyon avro əlavə vəsait ayrılıb. Enerji qiymətlərinə qarşı tətbiq olunan ümumi dəstək proqramlarının xərclərinin isə təxminən 1,4 milyard avroya çatacağı gözlənilir.

Yalnız fərdi avtomobil istifadəçiləri deyil, yüksək yanacaq xərclərindən birbaşa təsirlənən bəzi peşə qruplarına da əlavə yardım göstərilməsi planlaşdırılır.

Evə gedərək xidmət göstərən işçilər və sərbəst çalışan tibb bacılarına qət etdikləri məsafəyə uyğun əlavə dəstək verilməsi nəzərdə tutulur. Kənd təsərrüfatı, balıqçılıq və tikinti kimi yanacaq sərfiyyatının yüksək olduğu sahələr üzrə mövcud dəstək proqramlarının da davam etdiriləcəyi bildirilir.

Yanacaq qiymətlərinin artmasının arxasında isə son dövrdə benzin və dizel qiymətlərindəki bahalaşma dayanır. Məlumata görə, Yaxın Şərqdəki münaqişələrlə yanaşı, hasilat və neft emalı gücləri ilə bağlı problemlər də qiymətlər üzərində təzyiqi artırıb.

Hökumət dəstəyin əsas məqsədinin avtomobildən istifadə etmədən işə getməsi çətin olan işçilərin alıcılıq qabiliyyətini qorumaq olduğunu bildirir.