ABŞ-dan üzdə Rusiyaya, pərdə arxasında isə Çinə qarşı Mərkəzi Asiyada həmlə gəldi

Məlum olduğu kimi, dünən Astanada C5+1 formatında keçirilən görüş çərçivəsində iştirakçı ölkələrin yaşıl enerji, ətraf mühitin mühafizəsi və regional təhlükəsizlik çərçivəsində əməkdaşlığı genişləndirmək öhdəliyi təsdiqlənib. Görüşdə ABŞ dövlət katibi Entoni Blinken də iştirak edib və Astanada beş Mərkəzi Asiya ölkəsinin (C5+1 formatı) XİN nazirləri ilə görüşündən sonra keçirilən mətbuat konfransında Rusiyaya qarşı tətbiq edilən sanksiyaların Mərkəzi Asiya regionu ölkələrinə təsirini şərh edib. 
“ABŞ Mərkəzi Asiya ölkələrinə qarşı anti-Rusiya sanksiyalarının nəticələrini yumşaltmağa kömək edəcək”, deyə ABŞ dövlət katibi Blinken Astanada C5+1 formatında görüşü zamanı bildirib. O, həmçinin Mərkəzi Asiyada ticarətin şaxələndirilməsi və iş yerlərinin yaradılması üçün 25 milyon dollar ayrılacağını açıqlayıb.
Dünyanın onlarla ölkəsinin Rusiyaya qarşı tətbiq etdiyi sanksiyalar, eləcə də ixrac nəzarəti “sıfırdan meydana gəlməyib” dedi.
“Rusiyanın Ukraynaya təcavüzü səbəbindən ölkələr bu sanksiyaları tətbiq etmək üçün birləşib. Rusiyanın təcavüzü təkcə Ukraynaya qarşı deyil, həm də BMT-nin nizamnaməsinin beynəlxalq sisteminin əsasını təşkil edən prinsiplərə – ərazi bütövlüyü, müstəqillik, suverenlik xartiyasına – Mərkəzi Asiya ölkələri üçün böyük əhəmiyyət kəsb edən prinsiplərə qarşı yönəlib”, deyə Blinken ifadə edib.
"ABŞ və digər ölkələr təcavüzü dayandırmaq, qoşunların çıxarılmasına nail olmaq və Ukraynanın suverenliyini bərpa etmək üçün Rusiyaya maksimum təzyiq göstərməyə çalışırlar", deyə Entoni Blinken vurğulayıb.
“Biz sanksiyalara əməl olunmasını çox diqqətlə izləyirik və C5 tərəfdaşlarımız (Qazaxıstan, Qırğızıstan, Tacikistan, Türkmənistan və Özbəkistan) daxil olmaqla, bir sıra ölkələrlə iqtisadi sızmalarla bağlı daimi müzakirələr aparırıq. Çünki biz yaxşı bilirik ki, Rusiyanın bu təcavüzü təkcə Ukrayna üçün deyil, təkcə qeyd etdiyim prinsiplər üçün deyil, həm də çox spesifik şəkildə dünya ölkələri, o cümlədən Mərkəzi Asiya üçün real nəticələri olan təhdiddir”, Blinken deyib. 
ABŞ dövlət katibi bildirib ki, Vaşinqton şirkətlərə sanksiyalara məruz qalan Rusiya firmaları ilə əlaqələri kəsmək və ticarət əlaqələrini şaxələndirmək üçün vaxt vermək üçün lisenziyalar verir.
“Biz başa düşürük ki, bu proses vaxt aparır, bunu bir kliklə etmək mümkün deyil... Biz regionu gücləndirmək və Mərkəzi Asiyada yaşayan insanların həyatını yaxşılaşdırmaq üçün, o cümlədən, yeni ticarət yollarından istifadə etməklə və bizneslərə yalnız bir ölkəyə çox güvənməmək, həmçinin özəl sektor investisiyalarını cəlb etmək üçün yeni ixrac bazarları tapmaqda köməklik etmək əlimizdən gələni edəcəyik”, deyə Entoni Blinken əlavə edib.
Dövlət katibi qeyd edib ki, ABŞ regionun güclənməsinə və Mərkəzi Asiyada yaşayan insanların həyatının yaxşılaşdırılmasına töhfə verir.
O, ötən ilin sentyabrında ticarət yollarının şaxələndirilməsi və iş yerlərinin yaradılması üçün ayrılmış 25 milyon dollara əlavə olaraq, Mərkəzi Asiya ölkələri üçün daha 25 milyon dollar ayrılacağını açıqlayıb.
“Biz Rusiya təcavüzünün fəsadlarından xəbərdarıq və onları minimuma endirmək, yumşaltmaq və Mərkəzi Asiyadakı tərəfdaşlar üçün müxtəlif yeni imkanlar yaratmaq üçün mümkün olan hər şeyi edirik”, deyə ABŞ Dövlət Departamentinin rəhbəri bildirib.
Onun sözlərinə görə, ABŞ səlahiyyətliləri həmçinin ingilis dilinin öyrədilməsi, elektron ödəniş sistemlərinin inkişafı və geri qayıdan miqrant işçilərin təlimi üçün yardım etməyi planlaşdırır.
Ülviyyə, Hurriyyet.az