"ABŞ Rusiyanı iqtisadi baxımdan çökdürmək planını işə salıb" - ELXAN ŞAHİNOĞLU

"Rusiya heç yerdən maliyyə cəlb edə bilməyəcək, əlindəki rezervləri xərcləməkdə davam edəcək, inflyasiya gəlirləri sömürəcək"

"Rusiya Ukraynaya hərbi müdaxilə etsə, hər iki ölkə verəcəyi canlı itkilərlə yanaşı, iqtisadiyyatları da bərbad günə düşəcək. Son bir ayda müharibə haqqında söz-söhbətin özü belə, Ukrayna və Rusiya iqtisadiyyatına böyük zərər vurub. Kiyevin hesablamalarına görə, gərginlinlik fonunda təxminən, 12 milyard dollar kapital Ukraynadan çıxarılıb. Ukrayna prezidenti Vladimir Zelenskinin sözlərinə görə, Ukrayna iqtisadiyyatını canlandırmaq üçün ən azı 5 milyard dolar lazımdır". Hurriyyet.az xəbər verir ki, bu fikirlər "Atlas" Araşdırmalar Mərkəzinin rəhbəri, politoloq Elxan Şahinoğluna məxsusdur.

Politoloq qeyd edib ki, Rusiyada isə rubl və fond birjalarında şirkətlərinin səhmləri sürətlə dəyərdən düşür, kapital ölkəni tərk edir: "Müharibə söhbətləri bir neçə ay da davam etsə, hər iki ölkənin iqtisadiyyatı bundan da çox itirəcək. Yenə Ukraynaya əl tutan ölkələr var, Rusiya isə heç yerdən maliyyə cəlb edə bilməyəcək, əlindəki rezervləri xərcləməkdə davam edəcək. Əlbəttə, müharibə söz-söhbəti enerji resurslarının qiymətlərini artırıb və Rusiya satdığı neft və qaza görə gəlirlərini bir müddət artıra bilər. Ancaq bu müvəqqəti hal daşıya bilər. İnflyasiya gəlirləri sömürəcək. Vladimir Zelenski Qərb ölkələrində müharibədən çox danışılmasının Ukrayna iqtisadiyyatına mənfi təsirini artırdığını vurğulayıb. Vaşinqtonun isə Zelenskinin iradına cavabı belədir: “Müharibə təhlükəsi azdırsa bizdən daim niyə hərbi texnika istəyirsiniz?”. Kiyevin başqa alternativimi var? Zelenski bildirib ki, müharibə başlasa heç bir dövlət Ukraynaya silahlı qüvvələrini göndərməyəcək".

"Atlas" Araşdırmalar Mərkəzinin rəhbəri hesab edir ki, Ukrayna prezidenti mövqeyində haqlıdır, çünki müharibə başlasa Vaşinqton və Brüssel kənardan seyr edəcək: "Ona görə də Zelenski heç olmazsa Qərb ölkələrindən gərəkli lazımı hərbi texnika almağa çalışır. Ukrayna prezidenti müharibəyə hazırlaşmaqla yanaşı, ağır duruma düşən iqtisadiyyatını da düşünmək məcburiyyətindədir. Vaşinqton Rusiyanı iqtisadi baxımdan çökdürmək planını işə salıb. Ancaq Kiyev bu planın icrasının Ukrayna iqtisadiyyatına zərər verməməsini istəyir".

Vazeh BƏHRAMOĞLU,

Hurriyyet.az