“Atlant”ın hərracdan satılması tələb olundu

Bakı Ağır Cinayətlər Məhkəməsində 171 vətəndaşa qarşı 14 milyon manatdan artıq dələduzluq etməkdə ittiham olunan Nofəl Hacıyev və “Təbriz” MTK-nın icraçı direktoru Talış Məhəmmədovun cinayət işi üzrə məhkəmə prosesi yekunlaşmaq üzrədir.

Musavat.com xəbər verir ki, sonuncu prosesdə iş üzrə zərərçəkənlər çıxış edərək Nabrandakı “Atlant” Ailəvi İstirahət Mərkəzinin hərracdan satılaraq əldə olunan vəsait hesabına onlara vurulmuş ziyanın qarşılanmasını tələb ediblər.

“Atlant”ın sahibi Tahir Qədəşov məhkəmə prosesində maraqlı şəxs və şahid qismində tanınsa da, onun kürəkəni Nofəl Hacıyev müttəhimlər kürsüsündə əyləşib.

Aparılan istintaq zamanı məlum olub ki, Nofəl Hacıyev “Təbriz” MTK-nın inşa etdiyi binalardan mənzilləri vətəndaşlara satsa da, binalar təhvil verilməyib və vətəndaşlar evlərinə sahib çıxa bilməyiblər. Dələduzluq yolu ilə mənimsənilən 14 milyon manatdan artıq vəsaitin harada olması ilə bağlı suallara cavab verən N.Hacıyev bildirib ki, o, həm “Təbriz” MTK-da, həm də “Atlant” Ailəvi İstirahət Mərkəzində qayınatası Tahir Qədəşovla şərikdir.

Təqsirləndirilən şəxsin sözlərinə görə, vətəndaşlardan toplanan pullar qayınatasının təkidilə “Atlant”ın təmir-tikinti işlərinə, genişləndirilməsinə və abadlaşdırılmasına yönəldilib.

Məhkəmə prosesləri zamanı kürəkənlə qayınata arasında kəskin gərginlik yaşanıb. Məhkəmə zalında qayınatasını ağır ittiham edən Nofəl Hacıyev “Mən 30 il sənin qulun olmuşam. Allah sənə lənət eləsin!” deyərək etirazını bildirib.

Tahir Qədəşov bu sözlərə reaksiya verməsə də, sərbəst ifadəsində tikinti işlərinə qarışmadığını və MTK-da baş verənlərdən xəbərsiz olduğunu iddia edib. N.Hacıyev isə əlavə edib ki, 2000-ci illərdən bəri tikinti sektorunda uğurla fəaliyyət göstərsə də, 2022-ci ildən yaranan maliyyə çətinlikləri zamanı qayınatası vəd etdiyi köməyi göstərməyib. Hətta borcları bağlamaq üçün “Atlant”ın satılması təklif olunub, alıcı tapılsa da, T.Qədəşov son anda satmaqdan imtina edib.

Kürəkən həmçinin iddia edib ki, qayınatası istirahət mərkəzinin ərazisini genişləndirmək üçün 800-dən çox ağacı kəsdirərək təbiətə də zərər vurub.

İbtidai istintaq zamanı “Atlant” Ailəvi İstirahət Mərkəzinin üzərinə həbs qoyulub. Mənzillərini ala bilməyən və zərərə düşən vətəndaşlar məhkəmədə kəskin tələblərlə çıxış ediblər. Zərərçəkənlər “Atlant” İstirahət Mərkəzinin satılaraq dəymiş 14 milyon manatlıq zərərin ödənilməsini və pulların mənimsənilməsində şərik olan Tahir Qədəşovun da azadlıqda qalmayıb həbs olunmasını tələb edirlər.

Qeyd edək ki, 2002-ci ildə Nabranın meşəlik və dənizsahili ərazisində salınmış “Atlant” Ailəvi İstirahət Mərkəzi 4 akvaparkı, 200-ə yaxın kotteci, hotelləri, restoranları və geniş əyləncə infrastrukturu ilə regionun en böyük turizm obyektlərindən biridir. Müstəqil qiymətləndiricilər kompleksin dəyərini 80-100 milyon manat civarında qiymətləndirirlər.

Məhkəmənin verəcəyi qərar 171 ailənin taleyini və bu böyük kompleksin gələcəyini müəyyən edəcək.

Növbəti proses noyabrın 13-nə təyin olunub.