Avropa Birliyi sammit planlaşdırır: Paşinyana dəstək verəcəklər

May ayında Aİ-Ermənistan sammitinin keçirilməsi gözlənilir.

Publika.az xəbər verir ki, bu barədə BBC mənbələrinə istinadən məlumat yayıb.

Tədbir tezliklə geniş ictimaiyyətə açıqlanacaq. Adının çəkilməsini istəməyən BBC mənbələri Aİ-Ermənistan sammitini Avropa liderlərinin hazırkı baş naziri Nikol Paşinyanın yenidən seçilməsini dəstəkləmək istəyi ilə əlaqələndirirlər.

Ermənistanda parlament seçkiləri 7 iyun 2026-cı il tarixinə təyin edilib. Ermənistan Parlamenti birpalatalıdır və beş illik müddətə seçilən 107 üzvdən ibarətdir. Nikol Paşinyanın rəhbərlik etdiyi “Vətəndaş Müqaviləsi” Partiyası hazırda çoxluğa malikdir.

Bir müddət əvvəl Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaya Kallas Aİ-nin 2026-cı il parlament seçkiləri zamanı Ermənistana kömək etmək variantlarını müzakirə edəcəyini bildirmişdi.