Azərbaycanın mövqeyini “Qarabağ”ın baş məşqçisi Qurbanov ifadə edib
Xalqımız Ukrayna-Rusiya savaşında haqqın yanındadır
Rusiya silahlı qüvvələrinin 24 fevral 2022-ci ildə gecə yarısı Ukraynaya soxulması bütün dünyada hiddətlə qarşılanıb. Bütün dünya bu silahlı soxulmanı - saldırını qınayır, di gəl, bu qınaq elə qınaqdan o yana hələ keçmir. “Kiş-kiş” deməklə isə donuzun darıdan çıxmayacağını dədələrimiz təcrübədən keçiriblər.
Çoxları Azərbaycanın mövqeyinin açıq ifadə olunmadığını düşünür. Amma xalqın mövqeyi ortadadır, onu elə həmin saldırı günü – “Qarabağ” futbol klubunun baş məşqçisi Qurban Qurbanov haqsız qeydə alınan qoldan -qələbədən imtina etməklə ifadə etdi : AZƏRBAYCAN XALQI HƏR ÇAĞ HAQQIN YANINDADIR!
Haqq kimin yanındadırsa, xalqımız da onun yanındadır. Ukraynada , Kiyevdə isə haqq öz meydanında işğalçı güclə üz-üzədir. Haqq Kiyevin, güc Moskvanın yanındadır. Uca Tanrı da güclünün yox , haqlının yanında olar. İnşallah, güclü olan yox, haqlı olan qazanar. Qoy ədalət, haqq qazansın!
Məğrur BƏDƏLSOY