"Bizə qarşı birləşən mərkəzlərlə uzunmüddətli mübarizəyə hazır olmalıyıq" - ELXAN ŞAHİNOĞLU
"Ermənistanın hakimiyyət mənsubları bütün güclərini görüşdükləri həmkarlarından Azərbaycana təzyiqi artırmağa səfərbər ediblər"
"Azərbaycan Ermənistanın yüklərini Laçın yolundan Qarabağa girişinə icazə vermir, erməni separatçıları da Bakıdan göndərilən yüklərin qarşısını kəsiblər. Hadisələrin inkişafını necə proqnozlaşdırmaq olar? Bakının hansı həll yoluna üstünlük verdiyini prezidentin köməkçisi Hikmət Hacıyev səsləndirib: “Ağdam-Xankəndi yolu açıldıqdan 24 saat sonra Laçın yolu açılacaq”. Moskva başqa variant təklif edib: “Hər iki yol eyni zamanda açılsın”. Erməni separatçıları hər iki variantı hələ ki, qəbul etmirlər". Hurriyyet.az xəbər verir ki, bunu "Atlas" Araşdırmalar Mərkəzinin rəhbəri, politoloq Elxan Şahinoğlu qeyd edib.
Politoloq bildirib ki, separatçılar bu iki variantdan birini qəbul etsələlər belə, başqa suallar aktuallaşacaq: "Ağdam-Xankəndi yolu ilə Qarabağ ermənilərinə ərzağın daşınması hansı müddətdə davam edəcək?", "Yardımlarımızı qəbul edib dialoqdan imtina edəcəkləri halda yardımları kəsəcəyikmi?", "Ağdam-Xankəndi yolunun açılması müqabilində Laçın yolundan yüklərin birfədəlik keçidinə icazə verəcəyik, yoxsa hər iki yol paralel işləyəcək?" Belə vəziyyətdə Azərbaycan-Ermənistan danışılqarı, o cümlədən sülh sazişi, sərhədlərin müəyyənləşməsi və Zəngəzur dəhlizinin açılması arxa plana keçəcək. Ermənistanın hakimiyyət mənsubları bütün güclərini görüşdükləri həmkarlarından Azərbaycana təzyiqi artırmağa səfərbər ediblər. Əsas sözləri də budur ki, guya Azərbaycan Qarabağda etnik təmizləmə həyata keçirmək istəyir və beynəlxalq aləm bunun qarşısını almalıdır. Biz heç gizlətmirik ki, Azərbaycan qanunları ilə yaşamaq istəməyən ermənilər bölgəni tərk etməli olacaqlar".
Elxan Şahinoğlu əlavə edib ki, bu, etnik təmizləmə deyil, istənilən dövlətin normal tələbidir: "Buna baxmayaraq, bizə qarşı birləşən müxtəlif mərkəzlərlə diplomatik zəmində uzunmüddətli mübarizəyə hazır olmalıyıq".
Vazeh BƏHRAMOĞLU,
Hurriyyet.az