Cəmiyyətimizin bəzəyi - FOTOLAR

8 Mart Beynəlxalq Qadınlar  Bayramına  ürəkdən sevinməyə dəyər. Gül qoxulu, çiçək qədər zərif,   ürəyi halal  sevdalı qadınlar cəmiyyətin bəzəyidir, elə ömrümüzə dəyər qatan da onların günəş təbəssümüdür.  Həmçinin  bu həyatda  elə bir  sahə olmaz ki, orada qadın əməyi , qadın zəhməti hiss olunmasın.

Qısası  dahi Hüseyn Cavid  hələ o dövrdə  demişkən: “Qadın gülürsə, bu işsiz mühitimiz  güləcək, Sürüklənən  bəşəriyyət qadınla  yüksələcək.”  Astara Pedaqoji Kollecində  bizlər üçün həmişə əziz olanların  günü münasibətilə  keçirilən tədbirdə də  Şəhid atası,  Kollecin direktoru, professor Kamran Kazımov gözəlliyə yaraşan sözlər dedi...

Rəsmi və bədii hissədən ibarət olan tədbirdə ilk öncə Vətən uğrunda canından keçən şəhidlərin ruhu bir dəqiqəlik sükutla yad edildi və söhbətin davamını da professor gətirdi:- Bizim üçün çox xoşdur ki, Respublikamızda gedən ictimai siyasi proseslərdə qadınların rolu artıb, dövlət idarəçiliyi sistemində onlar lazımi səviyyədə təmsil  olunublar.  Ulu öndər Heydər Əliyev tərəfindən Azərbaycan qadınlarına olan diqqət və qayğı bu gün də Ölkə Prezidenti cənab İlham Əliyev tərəfindən uğurla görülür. Kollecin bütün xanım əməkdaşlarını 8 Mart - Beynəlxalq Qadınlar Günü münasibətilə təbrik  edirəm,   sizə  sağlamlıq, ailə səadəti arzulayıram.  Azərbaycanımızın çiçəklənməsi naminə yorulmaz fəaliyyətiniz həmişə bizi sevindirsin.

Tələbələrin rəngarəng çıxışları ilə könülləri sevindirən  tədbirdə video-çarx  nümayiş edildi, hər bir qadına qızılgül təqdim olundu.

Zəfər ORUCOĞLU,

Azərbaycan Jurnalistlər Birliyinin üzvü