Dayanmayan Ukrayna Rusiya müharibəsi: Azərbaycan hansı risklərlə üz-üzədir?

Ukrayna və Rusiya arasında davam edən müharibə regionda siyasi və iqtisadi gərginliyi artırır. Münaqişənin təsirləri qonşu ölkələr, o cümlədən ölkəmiz üçün də təhlükə və risklər yaradır. Azərbaycan həm humanitar, həm də ticarət əlaqələri baxımından bu gərginlikdən təsirlənir.

Azərbaycan öz təhlükəsizliyini və regional mövqeyini necə qoruya bilər?

Mövzu ilə bağlı “AzPolitika”ya açıqlamasında politoloq İlyas Hüseynov bildirib ki, Rusiya və Ukrayna arasında gedən müharibə Cənubi Qafqaza, eləcə də Azərbaycana təsir göstərir: “Çünki ənənəvi tədarük zəncirləri pozulur, yeni-yeni çağırışlar meydana çıxır. Bu, təkcə Avropanın deyil, ümumilikdə dünyanın diqqət mərkəzində olan bir müharibədir. Azərbaycan beynəlxalq sülhün, təhlükəsizliyin və sabitliyin təşviqinə xüsusi önəm verir. Hətta müharibənin dayandırılması və sülh danışıqlarının aparılması ilə bağlı Azərbaycan öz vasitəçilik təşəbbüsünü də irəli sürmüşdür. Bu məsələlərlə bağlı mediada zaman-zaman müxtəlif fikirlər səsləndirilir.