Dövlət quruculuğumuzda qadınlarımızın rolu və fəallığı - FOTO

“Azərbaycan dövlət quruculuğunda qadınlarımızın rolu və fəallığı”. Bu başlıqlı tədbir Masallı rayonunda təşkil  olunmuşdu.   Ağsaqqallar klubunda “8 Mart Beynəlxalq Qadınlar Günü” münasibətilə baş tutan tədbirin təşkilatçısı da elə Rayon Ağsaqqallar Şurası idi.

Tədbiri  açan Ağsaqqallar Şurasının sədri Ələşrəf  Niftiyev qadınları “8 Mart Beynəlxalq Qadınlar Günü” münasibətilə təbrik etdi və “Azərbaycan dövlət quruculuğunda qadınlarımızın rolu və fəallığı” mövzusunda geniş məruzəsində dedi:- Azərbaycan qadını hər zaman  layiq olduğu şərəfli, müqəddəs ana adını  uca tutmaqla müdrikliyi, ictimai-siyasi, mədəni həyatda fəallığı, işgüzarlığı və mübarizliyi ilə  seçilib.  Şərqdə ilk dəfə olaraq Azərbaycan Xalq Cümhuriyyəti dövründə qadınlara seçmək və seçilmək hüququnun verilməsi də ən böyük tarixi hadisədir. Azərbaycan qadını görkəmli dövlət, elm, mədəniyyət və ictimai-siyasi xadim adını qazanaraq, dövlətçilik tariximizdə mühüm rol oynayıb. Respublikamız dövlət müstəqilliyi  dövründə  ulu öndər  Heydər Əliyev qadınların cəmiyyətdəki rolu ilə bağlı siyasətin səmərəli şəkildə həyata keçirilməsinə, onların dövlət quruculuğunda, elm, mədəniyyət, təhsil, səhiyyə, idman və digər sahələrdə geniş təmsil olunmasına müstəsna əhəmiyyət verirdi. Məhz bunun  nəticəsidir   qadınlarımız təkcə respublikada deyil, ölkəmizin hüdudlarından kənarda  apardıqları dövlət əhəmiyyətli çoxşaxəli fəaliyyət proqramlarının yüksək səviyyədə həyata keçirilməsinə görə tanınır və beynəlxalq qurumlarda ölkəmizi ləyaqətlə təmsil edirlər.

Digər çıxışçılar- Masallı Rayon İcra Hakimiyyəti Başçısı Aparatının İctimai-siyasi və humanitar məsələlər şöbəsinin Baş məsləhətçisi Nuranə Muradova, iki şəhid atası Bayram Əsgərov, Heydər Əliyev Mərkəzinin direktoru Dilbər İbayeva, Tarix-diyarşünaslıq muzeyinin direktoru Əntiqə Tağıyeva, Ağsaqqallar Şurası İdarə heyətinin üzvü Nailə Əsədullayeva, Ağsaqqallar Şurasının Ərkivan qəsəbəsi üzrə nümayəndəsi Mirəyyub Əliyev, Şura üzvü, şairə Meysaba Aslanova, Rayon Mərkəzi Kitabxanasının direktor  əvəzi Zamin Məmmədov   xanımları  bayramla əlaqədar   təbrik etdilər, hazırda qadınlarımızın müstəqil Azərbaycan dövlətinin ictimai-siyasi həyatında getdikcə artan rolu və mövqeyi bizim milli dövlətçilik tariximizin ən böyük uğurları olmasını dedilər.

Tədbirdə iştirak edən qadınlara bayram münasibətilə qiymətli hədiyyələr  verildi.

Zəfər ORUCOĞLU,

Azərbaycan Jurnalistlər  Birliyinin  üzvü