Ermənilər “indeyski” raket istehsalına başlayır - Modiyə nə düşüb?!
Hindistanın “IDRW” hərbi portalı xəbər verir ki, Ermənistanla "Pinaka Mk-II" raketlərinin istehsalını və yığılmasını təşkil etmək imkanları müzakirə edilir.
Hurriyyet.net yazır ki, qəzetin məlumatına görə, mümkün razılaşma iki ölkə arasında hərbi-sənaye əməkdaşlığında yeni bir mərhələyə çevrilə və Ermənistana idxal olunan sursatdan asılılığını qismən azaltmağa imkan verə bilər.
Qeyd olunur ki, Ermənistan Silahlı Qüvvələri artıq Hindistanın "Pinaka Mk-II" idarəolunan raketləri, eləcə də uzun mənzilli "Pinaka" idarəolunmaz raketləri alıb. Lakin mümkün yerli istehsal proqramının əsasını hansı modifikasiyanın təşkil edəcəyi hələlik məlum deyil. Məlumata görə, Ermənistanın öz ərazisində istehsalın təşkilinə marağı müasir raket artilleriyasının xüsusiyyətləri ilə də bağlıdır. Çoxatəşli sistemlər uzunmüddətli döyüş əməliyyatları zamanı böyük miqdarda sursat istehlak edir, ona görə də öz istehsalına sahib olmaq təchizatın sabitliyini artıra və lazımi ehtiyatların formalaşmasını təmin edə bilər.
Razılaşma əldə edildiyi təqdirdə, Hindistan tərəfi texnoloji dəstək göstərə, istehsal proseslərinin təşkilində və erməni mütəxəssislərinin təlimində kömək edə bilər. Mümkün tərəfdaş Hindistanın dövlətə məxsus hərbi-sənaye kompleksi və ya digər müdafiə şirkəti hesab olunur. Lokallaşdırmanın mərhələli şəkildə davam edə biləcəyinə inanılır. Əvvəlcə Ermənistan Hindistandan təchiz edilən komponentlərdən və materiallardan istifadə edə bilərdi, daha sonra isə yerli məhsulların payı artacaqdı.
Eyni zamanda, istehsalın təşkilinin dəqiq modeli, istehsal olunacaq raketlərin mənzili və texnologiya ötürülməsinin mümkün şərtləri hələlik dəqiqləşdirilməyib. Tərəflər hələlik yekun razılaşmanın imzalandığını rəsmi olaraq elan etməyiblər.
Danışıqlar uğurlu olarsa, Ermənistan Hindistanın “Pinaka” raket ailəsi üçün xarici istehsal tərəfdaşlarından biri ola bilər. Yeni Delhi üçün bu layihə həm də hazır silahların ixracından xarici bazarlarda istehsalın daha dərin lokallaşdırılmasına keçid demək ola bilər.
Bundan öncə “Indian Defense Times” qəzetinin məlumatına görə , Hindistan əsgərləri Ermənistan ərazisində birbaşa "Akaş" hava hücumundan müdafiə sisteminin istismarı ilə bağlı erməni hərbçiləri üçün xüsusi təlimlər keçib. “Akaş” sistemi üzrə erməni heyətinə təlim keçmək üçün hind zabitlərinin göndərilməsi iki ölkənin silahlı qüvvələri arasında əməliyyat əməkdaşlığının genişlənməsinin sübutudur. Təlim sistemin imkanlarının, əməliyyat prosedurlarının, texniki xidmətinin və taktiki istifadəsinin öyrənilməsini əhatə edir. “Akaş” sistemi, təyyarələr, helikopterlər, dronlar və qanadlı raketlər də daxil olmaqla müxtəlif hava təhdidlərinə qarşı müdafiə üçün hazırlanmış orta mənzilli mobil zenit-raket sistemidir.
Qeyd edək ki, son illərdə Hindistan və Ermənistan arasında müdafiə sahəsində əməkdaşlıq genişlənir, hərbi texnikanın təchizatı, hərbi personalın təlimi, hərbi mübadilə təlimləri əhatə edir. Erməni zabitləri əvvəllər Hindistanda təlim keçiblər. Bundan əlavə, Ermənistan Hindistanın “Tarang Şakti” çoxmillətli aviasiya təlimlərində müşahidəçi kimi iştirak edib. Beləliklə, iki ölkə arasında qarşılıqlı əlaqə silah alışı çərçivəsindən kənara çıxır və daha geniş hərbi-texniki və əməliyyat əməkdaşlığını əhatə edir.
Yada salaq ki, Ermənistan Hindistanla 3,5–4 milyard dollarlıq tarixi silah müqaviləsi bağlamağa hazırlaşır. Paketə Su-30MKI tipli çoxmilliq döyüş təyyarələrinin daxil olması xüsusi diqqət çəkir. "HAL" şirkətinin məlumatlarına uyğun olaraq bu təyyarələr Hindistanın istehsalı olan AESA radar sistemi, hava-hava tipli “Astra” raketləri və DRDO-nun radioelektron mübarizə avadanlığı ilə təchiz oluna bilər. Habelə, Hindistan Silahlı Qüvvələrinin Müdafiə Qərargahı rəisi general Anil Çauhani bu il fevralın 1-də Ermənistana rəsmi səfər edib. Hindistan 2022-2024-cü illər arasında istehsal etdiyi bütün silahların 43%-ni Ermənistana satıb.