Ermənistanda 10 günlük tədbirə 30 milyon dollar xərclənib – Korrupsiya iddiası

Ermənistanda COP17 tədbirinin təşkili üçün ayrılan milyonlarla dollar müxalifətin sərt tənqidinə səbəb olub. “Güclü Ermənistan” fraksiyasının rəhbəri Narek Karapetyan hökuməti vəsaitlərin xərclənməsində korrupsiya risklərinə yol verməkdə ittiham edib.

Musavat.com xəbər verir ki, Karapetyan Stepanavanda jurnalistlərlə görüşündə 10 gün davam edən COP17 tədbirinə 30 milyon dollar xərcləndiyini bildirib.

Onun sözlərinə görə, bu məbləğ Gümrü şəhərinin illik investisiya büdcəsindən də çoxdur və həmin vəsait hesabına əhalinin mənzil problemlərinin əhəmiyyətli hissəsini həll etmək mümkün olardı.

Karapetyan tədbirin təşkili üçün keçirilən tenderin şəffaflığını da şübhə altına alıb. O bildirib ki, 22 milyon dollar yalnız bir şirkətə köçürülüb və tenderdə cəmi bir şirkət iştirak edib.

“Hər gün korrupsiya sxemlərini ifşa etdiklərini bəyan edirlər. Halbuki onların son 10 ildə üzə çıxardıqları ən böyük korrupsiya işinin məbləği bu 10 günlük tədbirə çəkilən xərclərlə müqayisə oluna bilər. Bir şirkətə 22 milyon dollar verilib, tenderdə isə yalnız bir iştirakçı olub. Xalqımız korrupsiyanın bu təzahürlərini görməlidir”, – deyə Karapetyan vurğulayıb.

Qeyd edək ki, 30 milyon dollarlıq xərc və tenderlə bağlı iddialar müxalifət nümayəndəsinin açıqlamasına əsaslanır. Onların müstəqil şəkildə təsdiqləndiyinə dair məlumat təqdim olunmayıb.