Ermənistanda matəm olacaq

Hurriyyet.az “Vestnik Kavkaza” portalına istinadla xəbər verir ki, İrəvanda yerləşən “Sürməli” alış-veriş mərkəzində baş verən yanğın faciəsi ilə əlaqədar Ermənistan hökuməti yaxın günlərdə matəm elan eləməyə hazırlaşır. Bu barədə məlumatı Ermənistanın Nazirlər Kabinetinin mətbuat xidməti verib.

Mətbuatın yazdığına görə, İrəvanın "Sürməli” ticarət mərkəzində baş vermiş partlayış nəticəsində ümumi sahəsi 3500 kv.m olan ikimərtəbəli tikili dağılıb.

Hazırda partlayışların baş verdiyi ərazidə yanğın söndürülüb, axtarış-xilasetmə işləri aparılır. Bu günə olan məlumata görə, hadisə nəticəsində 16 nəfər ölüb, 61 nəfər yaralanıb, 18 nəfər axtarışdadır. Axtarışda olanların arasında Rusiya və İran vətəndaşları da var.

Partlayışın səbəbi ilə bağlı hələlik rəsmi açıqlama verilməyib.

P.S. İrəvan xanlığının Rusiya qoşunları tərəfindən 1827-ci ildə işğalı ərəfəsində xanlığın inzibati-ərazi bölgüsü 15 mahaldan və xanlıqdan yarıasılı Şörəyel sultanlığından ibarət olmuşdur. Həmin 15 mahaldan birinin adı Sürməli olub. 23 iyun 1833-cü ildə çar I Nikolay “Erməni vilayəti”nin yeni adminstrativ quruluşunu təsdiq edir. İrəvan qəzası 4 dairəyə – İrəvan, Şərur, Sürməli və Sərdarabad dairələrinə bölünür.

Hürr Tərcüman