“Etibar Məmmədova görə vətəndaş evsiz qaldı” - Elçin Sadıqov

“Etibar Məmmədova görə vətəndaş evsiz-eşiksiz qaldı. Biz əvvəlcə Nərimanov Rayon Məhkəməsinə müraciət etmişdik. Bu məhkəmə vətəndaşın birotaqlı evlə təmin olunması ilə bağlı iddianı təmin etmişdi”. 

Hurriyyet.az xəbər verir ki, bu sözləri “Qafqazinfo”ya açıqlamasında vəkil Elçin Sadıqov deyib. O qeyd edib ki, Azərbaycan Milli İstiqlal Partiyasının qurucusu Etibar Məmmədova məxsus olan “Orxan-TİT” MTK ilə bağlı Bakı Apellyasiya Məhkəməsində baxılan işdə hakim Xumar Mərdanova iddianı qismən təmin edib:

“Amma həm biz, həm onlar apellyasiya şikayəti vermişdik. Təxminən 7-8 iclas keçirildi və tərəflərə deyildi ki, barışın. Lakin onlar barışmaq istəmədilər. Aprelin 5-də məhkəmə qətnaməsini elan etdi. Vətəndaşa 28 kvadrat metrlik ev verildi. Hansı ki, həmin binada 28 kvadrat metrlik mənzil yoxdur. Sökülən ev ümumi olsa da, Flora Məmmədovanın bacı-qardaşları ilə payları ayrıdır. Onun payı 20 kv metr olsa da, həmin evin yerində 21 mərtəbəli bina tikiblər. Deməli, 1 evin yerində 21 mənzil tikiblər. Amma vətəndaşa 28 min manat təklif edirlər. Eyni zamanda ekspertiza rəy vermişdi ki, sökülən binanın 1 kvadratı 2500 manatdır. Hazırda tikilən binada kvadratın qiyməti isə 1300 manatdır. Bu fərqə baxmayaraq, məhkəmə qanunsuz qərar çıxardı.

Onu da qeyd edim ki, Flora Məmmədovanın bacı-qardaşları "Orxan-TİT" MTK ilə birləşib Dağıstanda saxta etibarnamə hazırlamışdılar. Bizim Rusiya prokurorluğuna müraciətimiz əsasında həmin etibarnaməni saxtalaşdıran notarius həbs edildi”.

Məsələ ilə bağlı “Orxan-TİT” MTK ilə əlaqə saxladıq. Şirkətdən "Qafqazinfo"ya bildirilib ki, şikayətçi F.Məmmədovanın sökülən mənzildə qeydiyyatda olmayıb və onun qardaş-bacılarının hamısı ilə razılıq əldə edilib: "Mənzilin ümumi sahəsi 142,7 kv. m olub. Həmin mənzil sökülən zaman Rusiyada yaşayan F.Məmmədovanın digər qardaş-bacıları ilə bərabər 1/7 hissədə payı müəyyən edilib. Yəni mənzildə onun payına düşəçək sahə 20,4 kv.m-dir. Apellyasiya məhkəməsi Nərimanov rayon məhkəməsinin qətnaməsini dəyişdirib, iddianı qismən təmin edərək Məmmədova Floraya 28 min manat ödənilməsini qərara aldı. “Orxan-TİT” MMC uzun müddətdir, bütün vərəsələrlə münasibətləri hüquqi qaydada nizamlamağa çalışsa da, F. Məmmədova buna maneə yaradıb özünə 3 otaqlı mənzil tələb edib. Hesab edirik ki, sözügedən mənzilin sökülməsinə bütün mülkiyyətçilərin razılığı olub, qadın həmin mənzildə 30 ildən artıq yaşamayıb və o zaman qeydiyyatda belə olmayıb. Bu səbəbdən mənzilin qanunsuz sökülməsini iddia etmək ictimaiyyəti yanıltmaq cəhdidir".

“Orxan-TİT” MMC-nin Etibar Məmmədova məxsus olması iddiası ilə bağlı isə şirkətdən bildirilib ki, bu məlumat həqiqəti əks etdirmir.