İran Rusiya və Çinə güvənir: “Mövqeyimizi yaxşı bilirlər”

İran regionda və beynəlxalq müstəvidə baş verən proseslərlə bağlı strateji tərəfdaşları Rusiya və Çinlə sıx məsləhətləşmələr aparır. Tehran hər iki ölkə ilə müxtəlif kanallar vasitəsilə əlaqələri davam etdirdiyini bildirir.

Hurriyyet.net  xəbər verir ki, bunu İran Xarici İşlər Nazirliyinin sözçüsü İsmayıl Bəqai mətbuat konfransında açıqlayıb.

Diplomatın sözlərinə görə, Moskva və Pekin İranın strateji tərəfdaşlarıdır və Tehranın mövqeyindən, eləcə də mövcud vəziyyətə yanaşmasından yaxşı xəbərdardırlar.

“Biz həm Rusiya, həm də Çinlə sıx təmasdayıq. Çin və Rusiya bizim strateji tərəfdaşlarımızdır və mövqeyimizi yaxşı bilirlər”, – Bəqai bildirib.

XİN sözçüsü xüsusilə Rusiya ilə məsləhətləşmələrin davamlı xarakter daşıdığını vurğulayıb. Onun sözlərinə görə, tərəflər müxtəlif məsələləri, o cümlədən regional problemləri mütəmadi şəkildə müzakirə edirlər.

Bəqai qeyd edib ki, bu təmaslar telefon danışıqları ilə yanaşı, Tehranın Moskvadakı səfirliyi və Rusiya səfirinin İran paytaxtındakı fəaliyyəti vasitəsilə də həyata keçirilir.

İran rəsmisinin açıqlaması Tehranın mürəkkəb regional və beynəlxalq şəraitdə Rusiya və Çinlə diplomatik koordinasiyanı davam etdirdiyini göstərir. Bununla belə, tərəflər arasında aparılan məsləhətləşmələrin konkret nəticələri və müzakirə olunan məsələlərin detalları açıqlanmayıb.