"İrəvan dəmiryolunun bərpası üçün öz maliyyəsini xərcləməyəcək" - ELXAN ŞAHİNOĞLU

"Yenə ortada çox söz, çox vəd var, real irəliləyiş isə nəzərə çarpmır"

"Ermənistanın baş naziri Nikol Paşinyan Soçidə rusiyalı həmkarı Mixail Mişustinlə görüşdə deyib ki, Azərbaycanla regional nəqliyyat kommunikasiyalarının açılması prosesində irəliləyiş var. "Nəqliyyat kommunikasiyalarının açılması üzrə işçi qrupun son iclası zamanı nəzərəçarpacaq irəliləyiş qeydə alınıb və mən bundan çox məmnunam" - deyən Paşinyan Ermənistanın təkliflərinin qəbul olunacağına ümid etdiyini bildirib. Paşinyan hökumətinin son iki il ərzində işləyib hazırladığı təkliflərin kompromislərdən ibarət olduğunu vurğulayıb". Hurriyyet.az xəbər verir ki, bunu "Atlas" Araşdırmalar Mərkəzini rəhbəri, politoloq Elxan Şahinoğlu qeyd edib.

Politoloq bildirib ki, yenə ortada çox söz, çox vəd var, real irəliləyiş isə nəzərə çarpmır: "Misal üçün Azərbaycan Ermənistan sərhədinə qədər dəmiryol tikintisini yekunlaşdırmaq üzrədir. Ermənistan isə ərazisindəki 44 kilometrlik məsafədə heç bir iş görməyib. Ermənistan rəsmiləri bunun zaman alacağını vurğulayıblar. Yəni, yaxın günlərdə hər hansı sənəd imzalansa belə bu dəhlizin qısa müddətdə açılacağı anlamına gəlmir. Digər tərəfdən, İrəvan dəmiryolunun bərpası üçün öz maliyyəsini xərcləməyəcək, borc istəyəcək. Bu da vaxt itkisinə səbəb olacaq".

Vazeh BƏHRAMOĞLU,

Hurriyyet.az