İsrail Beynəlxalq Ədalət Məhkəməsinin (ICJ) hücumları dayandırmaq qərarına məhəl qoymur

Hurriyyet.az xarici mətbuata istinadən xəbər verir ki,İsrail ordusunun Qəzza zolağının cənubundakı Rəfah şəhərinə pilotsuz uçuş aparatları (PUA) ilə həyata keçirdiyi hücumlarda ən azı 2 fələstinlinin öldüyü, çoxlu sayda fələstinlinin isə yaralandığı bildirilib.

Birləşmiş Millətlər Təşkilatının məhkəmə orqanı olan Beynəlxalq Ədalət Məhkəməsinin (ICJ) hücumları dayandırmaq qərarına baxmayaraq, İsrail ordusu Rəfaha qarşı hücumlarını davam etdirir.

Fələstinin rəsmi agentliyi WAFA-nın xəbərinə görə, İsrail ordusu Rəfahın qərbindəki Tel əs-Sultan məhəlləsindəki bir evi PUA ilə hədəfə alıb. Hücum nəticəsində 1 nəfər ölüb, 1 nəfər yaralanıb.

İsrailin Rəfahın şimalındakı Khirbet əl-Ades bölgəsini hədəf alan hücumunda 1 nəfər ölüb, aralarında uşaq və qadınların da olduğu çox sayda insan yaralanıb.

Digər tərəfdən yerli mənbələrdən alınan məlumata görə, İsrail artilleriya birlikləri Qəzza zolağının mərkəzi hissəsində Nusayrat Qaçqınlar Düşərgəsinin şimalında yerləşən Qəzza Vadisi ətrafını bombalayıb.

Hücum nəticəsində ölən və ya yaralanan olub-olmadığı barədə məlumat verilməyib.