Kadırov ölümdən dönüb, vəziyyəti kritikdir – Putinin iclasında iştirak edə bilməyib

Çeçenistan lideri Ramazan Kadırovun səhhəti getdikcə ağırlaşır.

Hurriyyet.az xəbər verir ki, “Novaya Qazeta”-nın yazdığına görə, 24-25 dekabr gecəsi Kadırov təcili olaraq Moskvada xəstəxanaya yerləşdirilib.

Mənbənin məlumatına görə, Kadırov paytaxta Vladimir Putinin sədrliyi ilə keçirilən Dövlət Şurasının iclasında iştirak etmək üçün gəlib. Lakin onun səhhəti kəskin şəkildə pisləşib və o, təcili yardım maşını ilə Rusiya Federasiyası Prezidentinin İcra Aparatının Mərkəzi Klinik Xəstəxanasına aparılıb. Dövlət Şurasının iclası Çeçenistan Respublikası başçısının iştirakı olmadan keçib.

Mənbə bildirib ki, "Onu Moskvada güclə özünə gətirdilər, sonra evə qayıtdı və o vaxtdan bəri ictimaiyyət qarşısına çıxmayıb".

Qeyd olunur ki, Kadırov artıq ötən ilin əvvəlindən bir neçə dəfə Qroznıdakı "Aimedi" özəl klinikasına yerləşdirilib. Onun vəziyyəti pisləşməyə davam edib. Kadırov bunu dolayı yolla "birbaşa xətt"ə verdiyi müsahibədə etiraf edib və qeyd edib ki, təkcə bu il dörd rəsmi məzuniyyətə çıxıb. O, həmçinin səhhətinin pisləşməsinin açıq əlamətləri barədə də şərh verib. Çeçenistan rəhbəri bunu guya Ukraynadakı müharibədə olan çeçen döyüşçülərinə görə narahatlığı ilə əlaqələndirərək bildirib ki, "Əsəb pozğunluqlarım var, daimi gərginlik hissi keçirirəm, sanki elektrik cərəyanı üzərində oturmuşam". Bundan əvvəl "Novaya Qazeta" mənbələri Kadırovun böyrək problemləri ola biləcəyini yazmışdı. Onun mədəaltı vəzi nekrozu olduğuna dair də fərziyyələr var. Lakin heç kim onun dəqiq diaqnozunu bilmir, çünki bu barədə məlumat gizlədilir.

İyul ayında Türkiyənin "Milliyet" qəzeti Kadırovun Türkiyənin cənub-qərbində tətildə olarkən az qala boğulacağını və səhhətindəki problemlərə görə xəstəxanaya yerləşdirildiyini yazmışdı. Dekabr ayında "Verstka"nın mənbələri Çeçenistan rəhbərinin səhhətinin pisləşməsi səbəbindən respublika sakinləri ilə illik "birbaşa xətti"ni keçirə bilmədiyini bildirmişdi. Lakin o, bunu sonradan edə bilsə də, Kadırovun vətəndaşlarla ünsiyyəti 2019-cu ildən bəri ən qısa müddətdə oldu və mərkəzi kanallarda bununla bağlı yalnız qısa fraqmentlər verildi.

AzPolitika.info