Kreml təbliğat pullarını yenidən bölür

Rusiyada büdcə kəsirinə baxmayaraq, dövlət mediasının maliyyələşdirilməsinə milyardlarla rubl ayrılması davam edəcək. Lakin yeni federal büdcə layihəsində təbliğat mediası üçün nəzərdə tutulan pulların bölgüsü dəyişir: Dmitri Kiselyovun təmsil etdiyi strukturlar daha çox vəsait alacaq, Marqarita Simonyanın rəhbərlik etdiyi RT-nin maliyyəsi sonrakı illərdə azaldılacaq, Vladimir Solovyovun “Solovyov Live” kanalının büdcə maliyyələşdirilməsi isə 2028-ci ildən sıfırlanacaq.

Hurriyyet.media  xəbər verir ki, sənədə əsasən, hökumət büdcə kəsiri şəraitində belə ölkənin iki əsas dövlət telekanalına ayrılan vəsaiti artırmağı planlaşdırır.

VGTRK-nın maliyyələşdirilməsi təxminən 20 faiz artırılır. Holdinq 2026–2029-cu illərdə federal büdcədən ümumilikdə 81,9 milyard rubl – ildə təxminən 20,5 milyard rubl almalıdır.

Müqayisə üçün, əvvəlki 2025–2027-ci illər büdcəsində VGTRK üçün təxminən 51 milyard rubl, yəni ildə orta hesabla 17 milyard rubl nəzərdə tutulmuşdu.

Bu vəsait hesabına “Rossiya-1” telekanalında Dmitri Kiselyov və Yevgeni Popovun aparıcılığı ilə yayımlanan yekun siyasi proqramlar da maliyyələşdirilir.

Reytinqlərinin aşağı düşməsinə baxmayaraq, “Birinci kanal” da daha çox dövlət pulu alacaq. Konstantin Ernstin rəhbərlik etdiyi telekanala dörd il ərzində 23,2 milyard rubl – orta hesabla ildə 5,8 milyard rubl ayrılması nəzərdə tutulur. Əvvəllər kanal hər il təxminən 5 milyard rubl büdcə vəsaiti alırdı.

Mənbənin yazdığına görə, “Birinci kanal” hazırda televiziya reytinqlərində yalnız üçüncü yeri tutur, bəzi dövrlərdə isə dördüncü-beşinci pillələrə qədər geriləyərək REN TV və “Beşinci kanal”dan da geri qalır.

Dmitri Kiselyovun rəhbərlik etdiyi “Rossiya seqodnya” beynəlxalq informasiya agentliyinin maliyyələşdirilməsi də təxminən 10 faiz artırılacaq. Yeni büdcədə qurum üçün dörd ilə 36,1 milyard rubl – ildə təxminən 9 milyard rubl nəzərdə tutulub. Əvvəlki büdcədə üç il üçün 25 milyard rubl, yaxud ildə təxminən 8,3 milyard rubl ayrılmışdı.

Marqarita Simonyanın rəhbərlik etdiyi RT isə hələlik nəhəng dövlət maliyyəsini qoruyur. RT-nin hüquqi şəxsi olan “TV-Novosti” 2026–2029-cu illərdə ümumilikdə 105,3 milyard rubl almalıdır. Bu, orta hesabla ildə 26 milyard rubldan artıqdır.

Lakin RT üçün əsas dəyişiklik sonrakı illərdə başlayacaq. Büdcə layihəsinə görə, 2028 və 2029-cu illərdə kanalın illik maliyyələşdirilməsi kəskin şəkildə – 21 milyard rubla qədər azaldılacaq.

Ən ciddi dəyişiklik isə Vladimir Solovyovun “Solovyov Live” kanalını gözləyir.

Əvvəlki büdcədə kanalın arxasında dayanan “Telekompaniya Ştrixod” MMC-yə 2025–2027-ci illər üçün 4,5 milyard rubl – hər il 1,5 milyard rubl ayrılması nəzərdə tutulmuşdu.

Yeni layihədə “Solovyov Live” 2026-cı ildə 1,5 milyard, 2027-ci ildə də 1,5 milyard rubl alacaq. 2028-ci ildən isə büdcə maliyyələşdirilməsi sıfıra endirilir.