“Mehdiyevin Həbibbəyliyə vəzifə verəcəyi ilə bağlı xəbər qarayaxma oyunudur”

“Sosial mediada AMEA-nın prezidenti İsa Həbibbəylinin adının Ramiz Mehdiyevin vəzifə verəcəyi adamların sırasında çəkilməsi Milli Elmlər Akademiyasının rəhbərliyinə qarşı növbəti təxribatdır”.

Hurriyyet.net  xəbər verir ki, bu barədə AMEA məlumat yayıb.

Bildirilib ki, Ramiz Mehdiyev Akademiyanın rəhbəri vəzifəsində çalışdığı müddətdə İsa Həbibbəylinin tutduğu vəzifədən azad edilməsi və səlahiyyətlərinin aşağı salınması üçün Akademiyanın rəhbərliyi tərəfindən bir sıra rəsmi qərarlar qəbul olunub.

“AMEA Rəyasət Heyətinin Ramiz Mehdiyev tərəfindən imzalanmış 8 yanvar 2021-ci il tarixli 1/15 saylı qərarı ilə İsa Həbibbəyli AMEA-nın birinci vitse-prezidenti vəzifəsindən azad edilərək, vitse-prezident vəzifəsini icra edən təyin olunub.

Bundan başqa, Ramiz Mehdiyevin sədrlik etdiyi AMEA Rəyasət Heyətinin 26 yanvar 2022-ci il tarixli iclasının qərarı ilə İsa Həbibbəylinin 2013-cü ildən rəhbərlik etdiyi Humanitar və İctimai Elmlər Bölməsi iki yerə bölünüb, İctimai Elmlər Bölməsi alınaraq onun vəzifə səlahiyyətləri azaldılıb.

Bir neçə gündən sonra - 7 fevral 2022-ci il tarixdə İsa Həbibbəyli tutduğu Humanitar Elmlər Bölməsi üzrə vitse-prezident vəzifəsindən azad olunması haqqında AMEA rəhbərinə ərizə ilə müraciət edib.

Real vəziyyət və münasibətlər belə olduğu halda Ramiz Mehdiyevin İsa Həbibbəyliyə vəzifə verəcəyi barəsindəki informasiya indiki mövcud vəziyyətdən istifadə etməklə AMEA rəhbərinə yeni bir qarayaxma oyunu düzəltməyə xidmət edir”, - məlumatda vurğulanıb.

Qeyd edək ki, dövlətə xəyanət və digər ağır cinayətlərdə təqsirli bilinərək azadlıqdan məhrum edilən Ramiz Mehdiyevin hakimiyyətin çevrilişi cəhdindən sonra müəyyən şəxsləri vəzifəyə gətirəcəyi barədə iddialar yayılmışdı. Həmin şəxslərin arasında akademik İsa Həbibəylinin də adı çəkilərək onun Milli Məclisin sədri təyin olunacağı bildirilirdi.