"Parlament seçkilərinin nə vaxt keçiriləcəyini heç kimin bilməməsi artıq ilk ciddi pozuntusudur" - İLQAR MƏMMƏDOV

"Bilginin bu dərəcədə dumanlı olması hakim partiyanın rəqiblərinin seçkiyə lazımınca hazırlaşmaq haqqını pozur"

"Parlament seçkilərinin nə vaxt keçiriləcəyini heç kimin bilməməsi həmin seçkinin artıq ilk ciddi pozuntusudur. Konstitusiyanın tələbi 3 noyabrdır, amma hamı anlayır ki, COP29-a görə seçki həmin vaxt keçirilə bilməz". Hurriyyet.az xəbər verir ki, bunu Respublikaçı Alternativ Partiyasının (REAL) sədri İlqar Məmmədov bildirib.

Partiya sədri qeyd edib ki, namizədlər səsverməyə azı 1 il qalmış onun nə vaxt və hansı qaydalarla keçəcəyinə dair bilgili olmalıdırlar, əks təqdirdə bu pozuntudur: "Beynəlxalq standart belədir. Hazırki vəziyyət: seçki ya qarşıdakı yay aylarında keçirilir, ya da gələn ilin fevralından gec olmayaraq. Hər iki halda vaxt eləcə də sistemin majoritar və ya proporsional olması referendumun olub-olmamasından və nə qərar verməsindən asılıdır. Bilginin bu dərəcədə dumanlı olması hakim partiyanın rəqiblərinin seçkiyə lazımınca hazırlaşmaq haqqını pozur".

Vazeh BƏHRAMOĞLU,

Hurriyyet.az