Qorxunc xəstəlik sürətlə yayılır - Fövqəladə vəziyyət elan edildi

ABŞ-ın Nyu-York ştatında qızılca hallarının sürətlə artması rəsmiləri hərəkətə keçirib. Nyu-York qubernatoru Keti Hoxul ştat üzrə fövqəladə vəziyyət elan edib. Qərar noyabrın 4-dək qüvvədə olacaq.

Hurriyyet.net  xəbər verir ki, rəsmi məlumatlara görə, oktyabrın 3-dək ştatda bu il 108 təsdiqlənmiş qızılca hadisəsi qeydə alınıb. Onlardan 7-si Nyu-York şəhərində, 101-i isə ştatın digər bölgələrində aşkarlanıb. Hadisələrin böyük hissəsinin peyvəndlənmə səviyyəsinin aşağı olduğu kənd ərazilərində qeydə alındığı bildirilir.

Fövqəladə vəziyyət çərçivəsində səhiyyə sisteminə əlavə səlahiyyətlər verilib. Qeydiyyatdan keçmiş tibb bacıları həkim təsdiqini gözləmədən şübhəli hallarda qızılca testi tələb edə biləcək.

Bundan başqa, əczaçılara 2 yaşından etibarən uşaqlara qızılca, məxmərək və parotitə qarşı MMR peyvəndi tətbiq etmək səlahiyyəti verilib. Peyvəndlənmə səviyyəsinin artırılması üçün əlavə tədbirlərin də görülə biləcəyi açıqlanıb.

Nyu-Yorkda tətbiq edilən qərar ABŞ-da qızılca hallarının ümumi artdığı bir dövrə təsadüf edir. Reuters-in məlumatına görə, 2026-cı ildə ölkə üzrə təxminən 3 900 qızılca hadisəsi qeydə alınıb ki, bu da 1991-ci ildən bəri ən yüksək göstəricidir.