"Rusiyanı yalnız koalisiya formatında diz çökdürmək olar" - ELMAN VƏLİYEV

"Əgər üçlük bir masada əyləşəcəksə Ankara neytrallığı qoruyacaq, ancaq Kreml güzəştə getməyəcək və zənn etmirəm ki, separatçı rejimlər - Donetsk və Luqansk Türkiyənin vasitəçiliyini səmərəli hesab edələr"

"Birinci və ikinci dünya müharibələri dünyanın siyasi xəritələrini dəyişmək, yeni ərazilər ələ keçirmək uğrunda idisə, III dünya müharibəsi "enerji" qaynaqları uğrunda ola bilər. Amma dünya hələlik buna hazır deyil". Hurriyyet.az xəbər verir ki, bunu DİA (Dövlət İdarəçilik Akademiyası) Politoloqlar klubunun sədri, siyasi ekspert Elman Vəliyev qeyd edib.

Siyasi ekspert bildirib ki, Rusiya öz şərtlərini (əsas şərt NATO-nun şərqə doğru genişlənməməsi) diktə etmək üçün psixoloji təzyiqlər edir: "Avropanın qaz ehtiyatını Rusiya qarşılayır. Avropanı Rusiyadan azad etmək üçün gərək onun enerji ehtiyatlarını təmin edələr. ABŞ bunun üçün Qətəri alternativ görür, ancaq bu proses çox baha başa gələ biləcək bir layihədir. Almaniya Rusiyanın "Şimal axını 2" layihəsindən olduqca fayda götürdüyündən Ukrayna üçün qapılarını bağladı. NATO üzvlərinin Rusiyaya müharibə edəcəyini düşünmək emosionallıq ola bilər. Rusiyanın irəli sürdüyü şərtlərin künclərini yonaraq kompromis əldə etmək olar".

Elman Vəliyevin fikrincə, Rusiya Svestapol bazasına, Qara dənizin geostrateji mövqeyinə görə Kırımı güzəştə getməyəcək: "Ukrayna ehtiyatsız davransa, uduzacağına şübhəm yoxdur. Türkiyənin vasitəçi kimi iştirak etməsi (ehtimalı çox yüksək deyil) Rusiya üçün sərfəlidir. Əgər üçlük bir masada əyləşəcəksə (rejim rəhbərləri də ola bilər) Ankara neytrallığı qoruyacaq, ancaq Kreml güzəştə getməyəcək. Türkiyə Amerikanın təzyiqlərinə baxmayaraq, S-400-lərdən imtina etmədi. Lakin zənn etmirəm ki, separatçı rejimlər (Donetsk, Luqansk) Türkiyənin vasitəçiliyini səmərəli hesab edələr. Rusiyanı yalnız koalisiya formatında diz çökdürmək olar".

Vazeh BƏHRAMOĞLU,

Hurriyyet.az