"The New York Times" yazır: "Rusiya Xersonda təşkil etdiyi administrasiyanı evakuasiya edir"

Rusiya Xersonda təşkil etdiyi administrasiyanı evakuasiya edir. Bu barədə "The New York Times" yazır.
“Rusiya və Ukrayna qoşunlarının Xerson şəhəri uğrunda döyüşə hazırlaşdığı görünür, şəhərin küçələrində Kreml hakimiyyətinin əlamətləri sönür, qalan sakinlər nəyə inanacaqlarını bilmir və bundan sonra nə olacağından qorxurlar, sağ qalmaq üçün qida və yanacaq ehtiyatı yığırlar.
Rus əsgərləri, patrulları və nəzarət-buraxılış məntəqələri şəhərin mərkəzində birdən-birə çox az görünməyə başladı. Kremlin təyin etdiyi administratorlar 50 mil uzaqlıqdakı əraziyə köçüblər. Lakin rus qoşunları ərazini tərk etməyib. Ukrayna hərbi kəşfiyyatı bildirir ki, Rusiya Ukrayna hərbçilərinin Xersonu geri almasının qarşısını almaq üçün Dnepr çayının qərb sahilinə 40 minə yaxın əsgər yerləşdirib. Ukrayna qüvvələri şimaldan və qərbdən irəlilədikcə şiddətli müqavimətlə qarşılaşırlar və Ukrayna rəsmiləri cənub şəhəri uğrunda şiddətli döyüş gözlədiklərini bildiriblər, çünki bu şəhərin itirilməsi prezident Vladimir Putin üçün böyük strateji və simvolik itki olacaq.
Kreml yönümlü hərbi blogerlər cümə axşamı günü narahat olduqlarını bildiriblər ki,  Rusiyanın şəhəri ukraynalılara verməsi təkcə mülki deyil, həm də hərbi müstəvidə geri çəkilmək anlamına gəlir.
Son günlər rusların şəhərdən kənarda müdafiə mövqelərini gücləndirdiyi müşahidə edilir. Xersonda açıq-aşkar çaxnaşma yoxdur, baxmayaraq ki, bəzi sakinlər bombaların düşməyə başlamasının an məsələsi olduğuna inanırlar", deyə nəşr yazır.

Ülviyyə, Hurriyyet.az