Tramp İranla mümkün danışıqlardan danışdı – Tehrandan sərt reaksiya gəldi

ABŞ ilə İsrail və İran arasında qarşılıqlı raket hücumları ilə davam edən müharibə 11-ci gününə daxil olarkən, Donald Trump İranla mümkün danışıqlar barədə açıqlama verib. Tramp İranın görüşmək istədiyini iddia etsə də, Tehrandan bu fikirlərə sərt cavab gəlib.

ABŞ prezidenti "Fox News" kanalına müsahibəsində bildirib ki, İran tərəfi danışıqlara maraq göstərir.

“İran çox ciddi şəkildə görüşmək istəyir. Şərtlərdən asılı olaraq görüş mümkün ola bilər. Əslində artıq danışmağa məcbur deyilik, amma bu ehtimal qalır”, - Tramp bildirib.

Lakin bəzi mənbələrə görə, İran tərəfi hazırkı mərhələdə belə bir dialoqda iştirak etməyə maraqlı deyil. Digər mənbələr isə İranın Milli Təhlükəsizlik Şurasında müharibənin dayandırılması ilə bağlı hər hansı danışıqların gündəmdə olmadığını qeyd edib.

ABŞ tərəfindən səsləndirilən bu açıqlamalardan sonra İran parlamentinin sədri Mohammad Baqi Qalibaf ölkəsinin atəşkəs axtarmadığını bildirib.