📞 Təklif və şikayət: 077 333 22 85 / 077 366 22 00

Üçtərəfli görüşdə nələr deyildi... - “Əminəm ki, tarixə düşəcəyik”

2026-11-19 16:44:10

Üçtərəfli görüşdə nələr deyildi... - “Əminəm ki, tarixə düşəcəyik”

Rusiya Prezidenti Vladimir Putin, ABŞ Prezidenti Donald Tramp və Çin Sədri Si Cinpin arasında keçirilən üçtərəfli sammitin qapalı danışıqlarından əvvəl liderlərin iştirakı ilə açıq hissə baş tutub. Hər üç dövlət başçısı giriş nitqi ilə çıxış edərək görüşün məqsədlərini və müzakirə olunacaq məsələləri açıqlayıb.

Modern.az xarici KİV-ə istinadən xəbər verir ki, Si Cinpin bu formatda keçirilən sammitin tarixdə ilk olduğunu bildirib. Onun sözlərinə görə, görüşün əsas məqsədi böyük dövlətlər arasında münasibətlərdə sülhün və strateji sabitliyin qorunmasıdır.

Çin lideri Rusiya, ABŞ və Çin arasındakı qarşılıqlı əlaqələrin beynəlxalq təhlükəsizlik baxımından xüsusi əhəmiyyət daşıdığını vurğulayıb. O qeyd edib ki, bu üç ölkə sülhün qorunması istiqamətində məsuliyyət daşıyır.

“Tarix öyrədir ki, böyük dövlətlər arasında yaxşı münasibətlər dünyanı təhlükəsiz edir, qarşıdurma isə dünyanı xaosa sürükləyir”, – deyə Si Cinpin bildirib.

Putin: Ukrayna münaqişəsi də müzakirə olunacaq

Rusiya Prezidenti Vladimir Putin də üç dövlətin beynəlxalq sülh və təhlükəsizliyin qorunması sahəsində ortaq məsuliyyət daşıdığını vurğulayıb.

O, müzakirə mövzuları sırasında qlobal və regional iqtisadi əlaqələri, ərzaq və enerji təhlükəsizliyini qeyd edib.

Putin ölkələrin regional münaqişələrin nizamlanması ilə bağlı bir çox ortaq maraqlarının olduğunu bildirib və Ukraynadakı müharibəni də xüsusi vurğulayıb.

“Ölkələrimizin regional münaqişələrin nizamlanması, o cümlədən, əlbəttə ki, Ukraynadakı münaqişə ilə bağlı çoxsaylı ortaq maraqları var. Bu barədə dünən Çin Xalq Respublikasının Sədri ilə də danışmışdıq. Bu gün isə ABŞ Prezidentinin təşəbbüsü ilə ikitərəfli görüşdə həmin məsələyə geniş diqqət ayırdıq”, – deyə Rusiya lideri bildirib.

Tramp: “Əminəm ki, tarixə düşəcəyik”

ABŞ Prezidenti Donald Tramp üç böyük dövlətin liderlərini qarşıda çoxsaylı müzakirələrin gözlədiyini deyib.

“Əminəm ki, biz tarixə düşəcəyik”, – deyə Tramp vurğulayıb.

ABŞ lideri mümkün əməkdaşlıq istiqamətləri arasında nüvə arsenallarının azaldılmasını və nüvə silahlarının yayılması riskinin aşağı salınmasını xüsusi qeyd edib.

Tramp Ukrayna münaqişəsinin də müzakirə olunacağını təsdiqləyib. O, Putinlə bu məsələni artıq kifayət qədər uzun müddət müzakirə etdiyini və danışıqların düzgün istiqamətdə getdiyini düşündüyünü bildirib.

“Ümid edirəm ki, Prezident Putin və Ukrayna tərəfi bu münaqişəyə son qoymaq istəyəcəklər”, – deyə ABŞ Prezidenti əlavə edib.