Ukraynalı nazirdən çağırış: Müharibədən qazandığınız 200 milyardı bizimlə bölün

Ukraynanın energetika naziri Herman Qaluşenko bildirib ki, Ukrayna müharibəsi zamanı qiymət artımı hesabına mənfəətini artırmağa nail olmuş iri beynəlxalq enerji şirkətləri bu mənfəətin bir hissəsini ölkənin enerji infrastrukturunun bərpasına yönəltməlidir. 

Hurriyyet.az xəbər verir ki, bu barədə Politico yazır.

"Bir çox enerji şirkətləri müharibə səbəbindən böyük gəlir əldə edirlər. Bizim hesablamalarımıza görə, bu, 200 milyard dollardan çoxdur, onlar bu pulu müharibəyə görə alırlar, çünki biz müharibə şəraitindəyik. Düşünürəm ki, enerji infrastrukturunun bərpasına kömək etmək üçün bu pulu Ukrayna ilə bölüşmək ədalətli olardı”, - deyə Qaluşenko bildirib.

Politico-nun aydınlaşdırdığı kimi, ukraynalı nazirin qeyd etdiyi 200 milyard dollar rəqəmi tez-tez Britaniyanın Shell və BP, ABŞ-ın Chevron və ExxonMobil və Fransanın Total şirkətləri də daxil olmaqla beş aparıcı enerji şirkətinin 2022-ci il üçün qazancı kimi göstərilir. Fevralın əvvəlində CNN bu şirkətlərin son bir ildə 199,3 milyard dollarlıq rekord gəlir əldə etdiyini bildirib.

Qaluşenko qeyd edib ki, Litvanın "Ignitis Group" şirkəti artıq Ukraynanın bərpasına kömək etmək üçün qazancının təxminən 10%-ni göndərməyə hazır olduğunu bəyan edib. O, digər beynəlxalq şirkətləri də nümunə götürməyə çağırıb.