"Üzləşdikləri ağır məğlubiyyət ermənilərin əskəriyyətini ağıllandırmayıb" - ELXAN ŞAHİNOĞLU

"Sanki xarici ölkələrdən birində yerləşən böyük beyin mərkəzlərindən birinə "Azərbaycanı necə geri addım atmağa məcbur edə bilərik" mövzusunda fəaliyyət planı hazırlamaq sifarişi verilib"

"Laçın yolunun başlanğıcına yaxın ərazidə yüklə dolu nəqliyyat vasitələrinin gözləmə mövqeyində dayanması, Qarabağda separatçıların hərbi texnikanı bir məntəqədən başqasına daşıması, səngərlərin qazılması, erməni diasporunun müxtəlif ölkələrdə başlatdıqları “etiraz aksiyaları”, ermənipərəst konqresmenlərinin təxribatçı açıqlama və müraciətləri və BMT Təhlükəsizlik Şurasında təşkil edilən müzakirələr – bütün bunlar vahid ssenarinin müxtəlif bəndləridir". Hurriyyet.az xəbər verir ki, bunu "Atlas" Araşdırmalar Mərkəzinin rəhbəri, politoloq Elxan Şahinoğlu deyib.

Politoloqun sözlərinə görə, sanki xarici ölkələrdən birində yerləşən böyük beyin mərkəzlərindən birinə "Azərbaycanı necə geri addım atmağa məcbur edə bilərik" mövzusunda fəaliyyət planı hazırlamaq sifarişi verilib: "Bu riskli planı hazırlayanlar faktiki erməniləri Azərbaycanla növbəti qarşıdurmaya və itkilərə sürükləyirlər. Bu vəziyyətdə sülh mümkün deyil".

"Atlas" Araşdırmalar Mərkəzinin rəhbəri hesab edir ki, İkinci Qarabağ müharibəsində üzləşdikləri ağır məğlubiyyət ermənilərin əskəriyyətini ağıllandırmayıb: "Onlar reallığı qəbul etmək istəməyərək Azərbaycana qarşı təzyiqlə nəsə əldə edəcəklərini düşünürlər. Bu gözlənilən idi, ermənilər tarixən bu yolla gediblər".

Vazeh BƏHRAMOĞLU,

Hurriyyet.az